於人氣韓劇《雲畫的月光》中飾演朴寶劍護衛嘅「金兵沿」郭東延，因為跟朴寶劍非常老友而被指HeHe。郭東延今日飛甩老友，首次來港出席晚上於上水廣場舉行嘅聖誕亮燈儀式，並舉行首個香港粉絲簽名會，吸引大批粉絲捧場。

晚上6時50左右，郭東延終於現身，佢先進行亮燈儀式，之後用廣東話打招呼:「大家好，我係郭東延，好開心見到大家，希望同大家度過愉快嘅時間。」話好開心大家因為《雲畫》而咁支持佢，嚟緊佢都會集中於演藝工作，不過自己都好鍾意影相同拍攝。佢仲笑言自己嘅性格係隨季節改變，夏天會好cool，冬天係暖男。提到佢於《雲畫》中冇感情線，佢認為唔可惜，因為有朴寶劍呢個好兄弟，已經好滿足。

遊戲環節時，女粉絲戴上朴寶劍面具，跟郭東延重現《雲畫》經典場面。之後又跟粉絲玩投壺，玩完遊戲，郭東延當然有送抱及跟粉絲自拍，其中更捧實幸運粉絲嘅臉近半分鐘，二人深情對望，勁sweet，最後仲落台跟粉絲影大合照。

訪問環節時，郭東延趕到拍攝《雲畫》嘅趣事：「朴寶劍同金裕貞俾我嘅第一印象都好溫暖，所以拍攝時好開心。對於金裕貞揀咗金兵沿當理想型，我真係好多謝佢。」今次來港前有跟朴寶劍通電話，雖然對方未有推介香港好去處，不過就叫佢好好做。未來想跟韓星趙震雄合作，自己都好欣賞梁朝偉，未來有機會都想喺大中華發展。