香港司儀網

一年一度嘅「滙豐社區節」終於都圓滿落幕喇！能夠連續三年以司儀身份參與依個盛事，見證住佢舉辦得一年比一年成功，心裡面真係有份莫名其妙嘅感動～

 

今年嘅活動同「社聯」攜手炮製，除咗喺遮打道嘅大型嘉年華會，全港18區都有社區活動，可謂盛況空前！多得阿Anne、其他CS同事同埋「社聯」嘅安排令我今屆社區節可以同好多靚女拍檔合作～

 

先係朝早嘅揭幕典禮有英文流利兼樣貌甜美嘅Beverly做我拍檔，令到整個流程十分完美～ 之後落到遮打道就有頭髪長長、聲缐繞樑，對眼笑HeHe、個樣似BB嘅電台DJ天頤！佢除咗把聲好聽同搞笑之外，亦都係一位十分專業嘅司儀，基本上我哋兩個就算完全無稿都可以由頭講到尾，同佢拍檔真係好好玩～ 最後就梗係唔少得6位斯文美麗、談吐得體嘅義工司儀：Angel、Bonnie、兩位Emily、Irene同Viann啦！有妳哋介紹18區嘅社區活動，令到身處遮打道嘅朋友都可以即時感受到全港各區嘅熱鬧氣氛～ 期待好快有機會再同6位小師妹為公司慈善活動出一分力！

 

嚟到第四屆嘅社區節，除咗規模越嚟越大、氣氛越嚟越好、參與嘅人數越嚟越多之外，亦都期望可以真正做到「滙聚社群」，凝聚更多正能量去建立一個更有愛嘅香港，令到香港成為一個更可愛嘅家～ 出年第五屆「滙豐社區節」再見！