MC Alvin Li 李子俊 司儀紀錄: 活動主持 - 香港電競總會成立典禮 20151122
《齊撐E-Sports！》
今日好開心可以同Vivian師妹一齊為「香港電競總會成立典禮」擔任大會司儀。作為一位遊戲機迷嘅我，能夠親身見證住香港電競業開拓新一頁確實係十分榮幸。
電子競技並唔係打機咁簡單，而係好似體育競技咁，著重人與人之間嘅互動同交流，電子遊戲只不過係當中嘅媒介，高水平嘅智力同反應較技、團隊合作，與及係專業級嘅人才培訓先至係電競業嘅精髓。
活動得到各階層力撐！當中包括創科局局長楊偉雄先生同政府官員代表、遊戲廠商、網絡紅人⋯ 等等。七位創會董事喺楊局長手上接過委任狀亦標誌住「香港電競總會」正式成立！大會更安排嘉賓、網絡紅人同現場觀眾喺台上大玩PS4嘅「俄羅斯方塊：終極版」、「街霸V」、「NBA2K16」同埋「FIFA16」。壓軸環節仲安排咗一場「英雄聯盟表演賽」，由香港嘉賓隊決戰台灣女子隊。大會亦安排咗兩位專業評述為大家即時剖析戰況，令到現場氣氛更為高漲，最後香港嘉賓隊順利勝出表演賽。
喺度再一次恭喜「香港電競總會」正式成立，期待香港嘅電競業喺您哋嘅帶領底下可以迅速、蓬勃、健康咁成長！
- 2015-11-22
- 活動主持
